Our Lady Of Medjugorje
Messages From 2006 In Papiamento
Mensahe di dia 25 di yanüari 2006 "Mi yunan stimá. Awe tambe mi ta invitá boso, pa boso ta mensaheronan di e Evangelio na boso famia. Mi yunan stimá, no lubidá di lesa Santa Skritura. Pon´É na un lugá visibel i duna testimonio ku boso bida, ku boso ta kere i ta biba Dios su Palabra. Mi ta ku boso ku mi amor tièrno di Mama i Mi ta intersedé pa kada un di boso serka Yu. Danki pa korespondé na mi yamada." 01/2006
Mensahe di 25 di Febrüari 2006 "Mi yunan stimá Durante e tempu akí di kuaresma, ku ta tempu di grasia, Mi ta invitá boso pa boso habri boso kurason pa risibí e donnan ku Dios ke duna boso. No sera boso kurason: ku orashon i penitensia bisa “Sí’ na Dios i E lo duna boso na abundansia. Despues di tempu di sekura, ku e promé áwaserunan kuminsá kai, tera di kunuku ta pèrmití simia sprèit i duna fruta te shen pa un. Asina tambe Dios Tata ku ta den shelu lo duna boso na abundansia. Mi yunan stimá, Ami ta ku boso i Mi ta stima boso ku amor tièrno.Danki pa korespondé na mi yamada." 02/2006
Mensahe di dia 25 di Mart 2006 "Animo, mi yunan stimá! Ami a disidí di guia boso riba kaminda di santidat. Bira lomba pa piká i kuminsá kana e kaminda di e salbashon ku mi Yu a skohe. Pa medio di boso tribulashon i sufrimentunan, Dios lo mustra boso e kaminda di alegria. P´esei, mi yunan stimá, resa: Nos ta serka di boso ku nos amor. Danki pa korespondé na mi yamada." 03/2006
Mensahe di dia 25 di Aprel 2006 "Mi yunan stimá. Awe tambe Mi ke pidi boso: Tene mas konfiansa den Mi i den mi Yu. El a vense pa medio di su morto i resurekshon i, pa medio di Ami, E ta yama boso pa forma parti di su legria. Mi yunan stimá! Boso no por mira Dios, pero, si boso resa, boso por sinti ku E ta serka di boso. Ami ta ku boso i Mi ta intersedé pa boso dilanti di Dios pa kada un di boso. Danki pa korespondé na mi yamada." 04/2006
Mensahe di 25 di mei 2006 "Mi yunan stimá. Awe tambe mi ta invitá boso pa praktiká, pa biba e mensahenan ku Mi ta duna boso. Skohe pa santidat, mi yunan stimá, i pensa riba bida etèrna. Di e manera akí so boso lo tin pas den boso kurason, ku niun hende lo por destruí. Pas ta un don ku Dios ta duna boso ora boso resa. Mi yunan stimá, buska i traha ku tur boso forsa, pa pas por triunfá den boso kurason i den henter mundu. Danki pa korespondé na mi yamada." 05/2006
Mensahe di 25 di yüni 2006 "Mi yunan stimá. Kon legria profundo den mi kurason, mi ta gradisí boso pa tur e orashonnan ku boso a ofresé (hasi) pa mi intenshonnan. Sa, mi yunan stimá, ku boso, ni boso yunan lo no arepentí. Dios lo rekompensá boso ku grasia abundante I boso lo meresé bida eterna. Mi ta ku boso i mi ta gradisí tur esnan ku durante di e añanan aki a aseptá mi mensahe i a kambia (transformá) nan bida i a disidí pa biba un bida santu i biba pa alkansá pas. Danki pa korespondé na mi yamada." 06/2006
Mensahe di 25 di yüli 2006 "Mi yunan stimá. Durante e tempu di fakansi akí, no preokupá únikamente pa sosegá boso kurpa, ma mi yunan stimá, dediká tempu pa boso alma tambe. Den silensio mara Spiritu Santu por papia ku boso i permitiÉ kombertí i kambia boso. Ami ta ku boso i Mi ta intersedé dilanti di Dios pa kada un di boso. Danki pa korespondé na mi yamada." 07/2006
Mensahe di 25 di ougùstùs de 2006 "Mi yunan stimá: Awe tambe Mi ta invitá boso: resa, resa, resa. Ta únikamente pa medio di orashon, boso ta keda serka di Mi i serka di mi Yu, i boso lo kai na kuenta kon kòrtiku e bida aki ta. Den boso kurason lo surgi e deseo pa Shelu. Legria lo reina den boso kurason i orashon lo kuminsá kore manera riu. Den boso palabra lo tin únikamente palabra di gradisimentu na Dios, pa e realidat ku El a krea boso. I e deseo pa santidat lo bira un realidat pa boso. Danki pa korespondé na mi yamada." 08/2006
Mensahe di 25 di Sèptèmber 2006 "Mi yunan stimá. Awe tambe Mi ta ku boso i Mi ta invitá boso pa boso kombertí na un manera radikal. Disidí pa Dios, mi yunan stimá, i boso lo haña den Dios, e pas ku boso kurason ta anhelá Imitá bida di Santunan i mara nan por ta un ehèmpèl pa boso. Ami lo inspirá boso, miéntras ku Dios Todopoderoso ta pèrmití Mi keda huntu ku boso. Danki pa korespondé na mi yamada." 09/2006
Mensahe di 25 di òktober 2006 "Mi yunan stimá. Awe Señor Dios a pèrmití Mi bisa boso atrobe, ku boso ta biba den un tempu di grasia. Boso no ta konsiente, mi yunan stimá, ku Dios ta ofresé boso un oportunidat tremendo pa boso kombertí i biba na pas i amor. Boso ta asina siegu i mará na kosnan dje mundu materialista akí, i boso ta pensa riba kos mundano. Dios a manda Mi pa Mi guia boso riba e kaminda di bida etèrno. Ami, mi yunan stimá, no ta kansá, apesar ku Mi ta mira boso kurason tristu i kansá pa tur loke ta grasia i don. Danki pa korespondé na mi yamada!" 10/2006
Mensahe di 25 di novèmber 25, 2006 "Mi yunan stimá. Awe tambe Mi ta invitá boso: resa, resa, resa. Mi yunan stimá, ora boso resa, boso ta serka Dios i E ta duna boso e deseo di biba bida etèrno. Esaki ta un tempu favorabel pa boso papia mas tokante di Dios i pa hasi hopi mas pa Dios. P´esei, no resistí, sino pèrmitiÉ guia boso, i kambia boso i laguÉ drenta boso bida. No lubidá ku boso ta peregrinonan riba kaminda pa eternidat. P´esei, mi yunan stimá, pèrmití Dios guia boso manera un wardadó ta guia su trupa di karné. Danki pa korespondé na mi yamada." 11/2006
Mensahe di 25 di dezèmber 25, 2006 "Mi yunan stimá. Awe tambe mi ta trese den mi brasa pa boso Dibino Niño Hesus, Kende a kaba di nase. E ta Rei di shelu i tera, E ta boso pas. Niun hende, mi yunan stimá, por duna boso pas manera E ta dun´É, E ku ta Rei di pas. P´esei, ador´É den boso kurason, skoh´É i boso lo tin legria den djE. E lo bendishoná boso ku su bendishon di pas. Danki pa atendé mi yamada." 12/2006
Mensahe di 25 di dezèmber 25 - Jakov Colo
"Mi yunan stimá, awe ta dia grandi di alegria i pas. Legra boso huntu ku Mi. Mi yunan stimá, na un manera spesial, Mi ta invitá boso, pa santidat di boso famia. Mi ta deseá, mi yunan stimá, ku kada un di boso famia sea santu i ku legria i pas di Dios, ku Dios ta duna boso abundantemente, lo biba i reina den boso famia. Mi yunan stimá, habri boso kurason awe, ku ta un dia di grasia; disidí pa Dios i pon’É na e promé lugá den boso famia. Ami ta boso Mama. Ami stima boso i Mi ta duna boso mi bendishon di Mama."
